ელჩი ირაკლი ხუცურაული გაეროს ლტოლვილთა უმაღლესი კომისარიატის წარმომადგენელს შეხვდა

2024 წლის 12 თებერვალს, საქართველოს საგანგებო და სრულუფლებიანმა ელჩმა, ირაკლი ხუცურაულმა მონაწილეობა მიიღო ევროკავშირის საბჭოს ბელგიის თავმჯდომარეობის ფარგლებში გამართულ ღონისძიებაზე, რომელსაც ესწრებოდნენ შვედეთში აკრედიტებული ევროკავშირის წევრი და კანდიდატის სტატუსის მქონე ქვეყნები.

 

ღონისძიება საპატიო სტუმრის რანგში სიტყვით გახსნა ნორდიულ-ბალტიურ ქვეყნებში გაეროს ლტოლვილთა უმაღლესი კომისარიატის (UNHCR) ხელმძღვანელმა, ანიკა სუნდერლუნდმა.

 

სიტყვით გამოსვლისას, ანიკა სუნდერლუნდმა დამსწრე აუდიტორიას დეტალურად მოახსენა უახლესი ინფორმაცია ევროკავშირის საზღვრებზე მიგრაციის კუთხით არსებული ვითარების, თავშესაფრის მოთხოვნის რეგულირების მექანიზმებისა და კრიზისულ სიტუაციებში სამაშველო ოპერაციების განხორციელების თაობაზე.

 

მოხსენების შემდგომ, ელჩმა გაეროს წარმომადგენელთან ერთად იმსჯელა რეგიონული თანამშრომლობის აქტუალურ საკითხებსა და შემდგომ პერსპექტივებზე.